Starfsmenn tékkneska ríkisútvarpsins ?eská televize fóru í verkfall í dag til að mótmæla áformum ríkisstjórnar landsins um að gjörbreyta því hvernig fjölmiðillinn er fjármagnaður. Margir telja að breytingin muni ógna sjálfstæði hans.
Abc news greinir frá þessu.
Ef áformin verða samþykkt verður ríkisútvarp landsins fjármagnað af fjárlögum ríkisins í stað gjalda frá einstaklingum, heimilum og fyrirtækjum eins og fyrirkomulagið er í dag. Fjölmiðillinn fengi um 15% minna fé með nýja fyrirkomulaginu en hann fær nú, sem gæti leitt til uppsagna starfsfólks, takmarkaðrar framleiðslu og niðurfellingar dagskrárliða.
Gagnrýnendur segja að breytingarnar myndu greiða leið ríkisstjórnarinnar til að ná stjórn á fjölmiðlunum. Andrej Babi? forsætisráðherra Tékklands er forsprakki áformanna.
Fordæmalaust verkfall
Verkfallið er fordæmalaust í sögu tékkneskra almannaþjónustumiðla, segir Michal Kubal, fréttastjóri tékkneska ríkisútvarpsins.
Þúsundir mótmælenda söfnuðust saman í miðborg Prag í dag til að krefjast þess að ríkisstjórnin dragi til baka fyrirhugað lagafrumvarp og efni til ítarlegrar og gagnsærrar opinberrar umræðu um málið.
Þegar Tékkar kveiktu á sjónvarpsstöð ríkisútvarpsins í dag stóð á skjánum: ,,Við gerum allt sem í okkar valdi stendur til að tryggja að við getum áfram veitt almannaþjónustu í fullu umfangi og gæðum í framtíðinni."
Í útvarpinu var að mestu spiluð tónlist en inn á milli var verkfallið útskýrt og í kjölfarið mínútu þögn.
