Andreas Almgren er 31 árs Svíi sem hóf ferilinn sem 800 metra hlaupari og keppt á EM í frjálsíþróttum í þeirri grein árið 2014 og á HM ári síðar. Svo gufaði hann hins vegar upp á stórmótum þar til árið 2022 að hann kom á EM og varð fjórði í 5000 metra hlaupi. Hann vann svo brons í 10.000 metra hlaupi á HM í fyrra og fylgdi því eftir á EM í Birmingham í ágúst með fáheyrðum yfirburðum í 10.000 metra hlaupinu.
Almgren hringaði alla keppendur á EM um mitt hlaupið og kom í mark langt á undan öllum öðrum og setti samt mótsmet. Hann bætti svo um betur þegar hann varð heimsmeistari í hálfu maraþoni í Kaupmannahöfn í september á 58 mínútum og sex sekúndum.
Svo ákvað hann að prófa að hlaupa heilt maraþon í fyrsta sinn um helgina í New York maraþoninu, einu stærsta hlaupi ársins. Þar skákaði hann hann fjölmörgum sterkum keppendum og kom 15 sekúndum á undan næsta manni í mark á tveimur klukkustundum, sex mínútum og einni sekúndu.
,,Ég gæti ekki beðið um betri frumraun. Ég gæti eiginlega grátið eftir þetta hlaup," sagði Almgren í viðtali við ESPN eftir sigurinn í maraþoninu. Hann sagðist jafnframt vera klár í að hlaupa fleiri maraþonhlaup. Andreas Almgren er í það minnsta nafn sem fólk ætti að leggja á minnið, þó alls óvíst sé að hvaða vegalengd hann mun einbeita sér á næstunni.
