,,Þetta er ákaflega lágstemmd frásögn, alveg einstaklega vel skrifuð skáldsaga," segir Kolbrún Bergþórsdóttir um bókina Ljósfaðir eftir Guðrúnu Evu Mínervudóttur.

Bókin er söguleg skáldsaga sem gerist á nokkrum mánuðum í Skagafirði fyrir sirka 100 árum. Þar býr aldraður bóndi, Jónas, með þriðju eiginkonu sinni og miklum barnaskara. Jónas, sem á sér raunverulega fyrirmynd, eignaðist 33 börn með þremur eiginkonum.

Á andlegu nótunum

Sagan fylgir eftir Jónasi yngri, barnabarni Jónasar eldri, sem snýr aftur frá Vesturheimi. Kolbrún segir hann dálítið óljósa persónu sem höfundurinn hefði mátt tálga betur. Hún er engu að síður stórhrifin af bókinni.

,,Þetta rennur einhvern veginn svo ljúflega áfram og þetta er saga sem er, ég veit ekki hvort allir munu taka eftir, hún er mjög mikið á andlegu nótunum," segir Kolbrún. Hún segir hjónin á bænum senuþjófa bókarinnar og að tenging þeirra komi skýrt fram í textanum. ,,Ég hugsaði, svona gerir bara afburðahöfundur. Mikið svakalega var þetta vel gert."

Töfrandi bók

Ingibjörg Iða Auðunardóttir telur marga eiga eftir að hrífast af þessari bók. ,,Ef það ætti að lýsa þessari bók í einu orði þá myndi ég segja að hún væri svolítið töfrandi. Þetta er ekki töfraraunsæi að neinu leyti en hún er bara svo heillandi og mystísk."

Egill Helgason segir persónugallerí bókarinnar stórkostlegt. ,,Ég verð að segja eins og er að mér finnst þessi bók skrifuð af svo miklu mannviti. Hún Guðrún Eva er bara svo vitur manneskja," segir Egill og bætir því við að bókin komi á óvart því hún sé öðruvísi en fyrri bækur Guðrúnar Evu.

Kolbrún Bergþórsdóttir fann sterkt fyrir tengingu hjónanna í bókinni Ljósfaðir. ,,Ég hugsaði, svona gerir bara afburðahöfundur. Mikið svakalega var þetta vel gert."

Gagnrýnendur Kiljunnar fjölluðu um bókina Ljósfaðir eftir Guðrúnu Evu Mínervudóttur í síðasta þætti. Hægt er að horfa á þáttinn í spilaranum hér fyrir ofan.

31.10.2026 14:00