Íslenska karlalandsliðið í handbolta kom saman til æfinga í Safamýri í dag. Hluti leikmannahópsins er þó enn á leið til landsins, eða þeir leikmenn sem spiluðu með félagsliðum sínum erlendis í gær. Snorri Steinn Guðjónsson landsliðsþjálfari segir nær alla leikmenn heila fyrir komandi leiki, en staðan á einhverjum lemstruðum leikmönnum verði skoðuð í dag.

Þó sé ljóst að línumaðurinn og varnardrekinn Ýmir Örn Gíslason verði ekki með í landsleikjunum fram undan. Ýmir fór í handaraðgerð í sumar og hefur ekkert spilað með liði sínu, Göppingen í Þýskalandi á þessari leiktíð. Ýmir sagði í samtali við RÚV í dag að hann væri nú hér á landi til frekar skoðunar og vonaðist til að fá skýrari mynd síðar í dag eða á morgun með tímaramma á bataferlinu.

Ísland tekur á móti Úkraínu í fyrsta leik sínum í undankeppni EM 2028 í Laugardalshöll á miðvikudagskvöld. Einungis um 100 miðar eru óseldir á leikinn og því fer hver að verða síðastur að tryggja sér miða. Íslenska liðið æfir svo áfram á Íslandi til laugardags þegar það ferðast til Eistlands og spilar við heimamenn þar á sunnudag. Báðir leikirnir verða sýndir á rásum RÚV.

02.11.2026 11:13