Snorri Steinn Guðjónsson landsliðsþjálfari íslenska karlalandsliðsins í handbolta gerði í dag eina breytingu á landsliðshópnum sínum fyrir komandi leiki í undankeppni EM 2028. Einar Þorsteinn Ólafsson er meiddur á nára og getur ekki tekið þátt í leikjunum.

Í stað Einars Þorsteins kallaði Snorri til Teit Örn Einarsson. Teitur verður því til taks í leikjunum tveimur fram undan. Undankeppni EM 2028 hefst með leik Íslands og Úkraínu í Laugardalshöll klukkan 19:30 annað kvöld. Uppselt er orðið á leikinn, en hann verður einnig sýndur á RÚV 2.

Íslenska liðið sækir svo lið Eistlands heim á sunnudaginn. Þegar var orðið ljóst að Ýmir Örn Gíslason væri frá vegna handarmeiðsla. Þá verður Viggó Kristjánsson í leikbanni í Úkraínuleiknum á morgun og Elliði Snær Viðarsson fær leyfi af persónulegum ástæðum í útileiknum við Eistland.

03.11.2026 18:48