,,Þetta var í raun eins og risastórt karókí, það voru allir að syngja með," segir Höskuldur Sæmundsson sem er nýkominn af tónleikum CAKE í Lundúnum. Hljómsveitin virðist vera í fantaformi um þessar mundir. Gæðaþrenna frá CAKE var leikin í Morgunverkunum á dögunum.

Meðlimir CAKE gera sér það að leik á hverjum tónleikum að gefa plöntu þeim tónleikagesti sem giskar rétt á tegund plöntunnar. Þá er sá sami kallaður upp á svið og þiggur plöntuna að gjöf.

Á tónleikunum í Lundúnum varð Höskuldur vitni að því þegar sá sem giskaði rétt á perutré mætti á svið og kom færandi hendi. ,,Hér er ég með sultu handa ykkur," segir Höskuldur manninn hafa sagt. Þá hafði maðurinn áður fengið plöntu að gjöf og mætti með sultu af þeirri plöntu.

Hlusta má á frásögn Höskuldar í Morgunverkunum með því að smella á myndina.

31.10.2026 10:29