Maður sem segir að Íris Helga Jónatónsdóttir hafi áreitt sig segir hana hafa valdið sér og fjölskyldu sinni miklum sálrænum skaða og að þau telji sig ekki örugg lengur. Hún áreiti þau enn.

Tekin var skýrsla af fyrsta brotaþola í máli Írisar Helgu við framhald aðalmeðferðar í morgun. Íris Helga er sökuð um umfangsmikið umsáturseinelti gegn þremur mönnum, sambýliskonu eins þeirra, börnum tveggja þeirra og fjölskyldum.

Maðurinn sagði að hegðun Írisar Helgu hefði valdið þeim mikilli hræðslu og kvíða.

,,Við þurftum alltaf að vera á varðbergi," sagði maðurinn.

,,Við gátum ekki upplifað eðlilega hversdagslega hluti eins og að hafa dyrnar ólæstar," sagði hann. Öryggistilfinning þeirra væri horfin.

Ýmislegt undarlegt í fari Írisar Helgu

Samband mannsins og Írisar Helgu hófst 2021 en því lauk í janúar 2022. Maðurinn sagði að ýmislegt undarlegt í fari hennar hefði komið fram í sambandinu.

,,Hún gat ekki svarað hvort hún og barnsfaðir hennar væru enn saman," sagði maðurinn sem nefndi einnig að Íris Helga hefði sent honum skilaboð um að hún væri ólétt. Þá hefði hún orðið veik og þurft að leggjast inn á spítala og þurft járngjöf.

Ýmislegt hafi ekki komið heim og saman og Íris Helga hafi átt erfitt með að svara spurningum. Þá hafi maðurinn heyrt af því að Íris Helga væri að tala illa um hann við vinkonur sínar.

Setti upp öryggismyndavélar eftir atvik

Fyrsta atvikið hafi verið þegar Íris Helga kom að heimili mannsins með blómavasa sem hún hafði brotið þar fyrir utan. Íris Helga tjáði sig um blómavasann við skýrslutöku í gær og viðurkenndi þá að hafa brotið hann. Hann hefði verið stílaður á hana og dóttur hennar en Íris Helga hefur sakað manninn um að hafa misnotað dóttur sína. Maðurinn neitar því.

,,Út frá þessu fer ég í Elko og kaupi öryggismyndavél og set hana upp 1. mars," sagði maðurinn.

2. mars 2022 hafi Íris Helga mætt heim til hans þrátt fyrir að hafa sent skilaboð á manninn um að hann ætti aldrei að tala við sig aftur.

Þegar hún kom að heimili mannsins hafi hún reynt að troða sér inn um dyrnar. Sonur hans hafi orðið vitni að atvikinu. Hún hafi í framhaldi af því sparkað í bifreið hans.

Stuttu síðar fær maðurinn tölvupóst með ástarjátningu frá Írisi Helgu og eftir það hafi áreitið byrjað.

Í framhaldi af því á Íris að hafa sent á manninn:

,,Ég mun bætast í hópinn á öllum þeim konum sem hafa ásakað þig um kynferðislegt ofbeldi."

Áreiti úr öllum áttum

Áreitið hafi byrjað á því að Íris Helga hafi sent skilaboð á vinkonur og vini mannsins. Hún hafi tjáð þeim að maðurinn væri klikkaður. Fyrst hafi hún gert það undir eigin nafni. Íris Helga hafi þá einnig varað við manninum á samfélagsmiðlum.

Þegar fólk hafi hætt að trúa henni hafi hún byrjað að búa til mismunandi aðganga til þess að halda áreitinu áfram.

Samstarfskona hans hafi látið hann vita að búið væri að skrá hann á stefnumótaforritið Tinder, sem hann telur að Íris Helga hafi gert.

Skrýtin skilaboð hafi borist með hótunum.

,,Þetta var úr öllum áttum," segir maðurinn sem segir að erfitt hafi verið að loka fyrir það að skilaboðin bærust.

Þetta hafi fyrst byrjað í gegnum Instagram og Messenger. Margir í kringum hann hafi sagt að þetta væri í samhengi við fyrri hegðun Írisar Helgu.

Brast ítrekað í grát við skýrslutökuna

Þegar maðurinn byrjaði að búa með núverandi sambýliskonu sinni vissi hún hver Íris Helga var. Hún sjálf hefði lokað á Írisi Helgu þar sem hún hefði sent skilaboð biðjandi um upplýsingar um manninn.

Þegar hún reyndi að ræða við Írisi Helgu fékk hún ekki svar. Þá hafi Íris byrjað að senda á son mannsins óviðeigandi skilaboð um samband þeirra.

,,Ég mun ekki hætta að senda ykkur og áreita ykkur fyrr en [maðurinn] er farinn úr lífi ykkar," var meðal annars það sem á að hafa verið í skilaboðum Írisar.

Sambýliskona mannsins gaf einnig skýrslu í dag.

,,Hún var bara að ljúga endalaust um barnsföður sinn og einhvern annan mann í Noregi," sagði konan. Hún hafi sagt að allir væru að berja sig. Barnsfaðir hennar hefði beitt hana heimilisofbeldi og konunni hafi þótt erfitt að vera í kringum Írisi Helgu þar sem hún hafi ekki getað svarað spurningum um ásakanir sínar.

Konan lýsti því að áreiti Írisar Helgu hefði haft mikil sálræn áhrif á hana og brast ítrekað í grát við skýrslutökuna.

Skilaboð send á vinnuveitendur

Maðurinn lýsti því að skemmdarverk hefðu verið unnin á bíl hans með því að rispa hann. Áreitið hafi því orðið meira og tjón hafi orðið á eignum mannsins. Sett hafi verið sýróp inn um bréfalúguna hjá sambýliskonu hans.

Skilaboð hafi síðar verið send á vinnuveitanda mannsins. Mannauðsdeild í vinnu hans hafi verið látin vita af ástandinu.

Forstjóri vinnustaðarins hafi fengið tölvupóst þar sem tilkynnt var að maðurinn væri nauðgari. Skilaboð hafi einnig verið send á vinnustað sambýliskonu hans þar sem hún var sökuð um að smygla eiturlyfjum. Þau hafi reynt að vara alla nákomna við áreitinu.

Einnig hafi borist tilkynningar til barnaverndar. Maðurinn hafi fengið skilaboð frá Reykjanesbæ um að hann sjálfur hefði tilkynnt sambýliskonu sinni um lélega umhirðu á barni sínu. Kona sem hann ræddi við hjá barnavernd hefði fengið upplýsingar um áreitið og orðið mjög hissa.

Fleiri tilkynningar um ýmsar ásakanir á hendur þeim báðum hafi síðar meir borist til barnaverndar.

Þeim hafi verið tjáð að málið yrði ekki rannsakað. Kennarar og aðrir sem barnavernd hafði samband við staðfestu ekki tilkynningarnar.

Verjandi verður að fá að spyrja vitnið

Maðurinn starfaði um hríð hjá Reykjanesbæ en var sagt upp störfum þar.

Dómari hafði afskipti af Helgu Völu Helgadóttur, verjanda Írisar Helgu, þegar hún vildi fá manninn til að tjá sig um hvers vegna maðurinn var rekinn.

,,Ég er að spyrja um trúverðugleika vitnisins," sagði Helga Vala. ,,Verjandi verður að fá að spyrja vitnið."

Þá sagði Helga Vala að þegar verjendur ætluðu að spyrja vitni að einhverju þá gerðist það nánast undantekningarlaust að þeir væru stoppaðir. Maðurinn kaus að svara ekki en það sem Helga Valda reyndi að draga fram var að maðurinn hefði verið rekinn vegna áreitis í garð kvenna.

03.11.2026 12:02