Forsvarsmenn netáfengisverslunarinnar Santé hafa kvartað til nefndar um eftirlit með lögreglu (NEL) vegna starfshátta tveggja lögregluembætta.
Annars vegar lýtur kvörtunin að meintu aðgerðarleysi lögreglustjórans á Suðurnesjum við meðferð á kæru Santé á hendur þýska fyrirtækisins Heinemann og hins vegar lýtur hún að rannsókn lögreglunnar á höfuðborgarsvæðinu á smásölu áfengis.
Þá er einnig kvartað vegna almennra starfshátta lögreglu og ósamræmis milli umdæma.
Annað málið óafgreitt en hitt sótt af fullum þunga
Heinemann tók yfir rekstur fríhafnarinnar á Keflavíkurflugvelli árið 2025, en Santé kærði fyrirtækið til lögreglu vegna ólögmætrar smásölu á áfengi í fríhöfninni og sagði ósamræmi í beitingu laga óásættanlegt.
Í kvörtuninni bendir Santé á að kæra gegn stórum, erlendum rekstraraðila liggi óafgreidd mánuðum saman á Suðurnesjum, á meðan smærri innlendur aðili sé sóttur til saka af fullum þunga á höfuðborgarsvæðinu.
Arnar Sigurðsson, annar eigenda Santé, segir lögreglustjórann á Suðurnesjum hvorki hafa hafið rannsókn né vísað kærunni frá. Einu viðbrögðin hafi verið óformleg svör um að málið sé enn til skoðunar.
Á meðan hafi rannsókn lögreglu á starfsemi Santé haldið áfram. Þá hafi hann heldur ekki heyrt frá NEL en kvörtunin var send 13. júlí í ár. Formaður nefndarinnar segir meðferðartíma almennt á bilinu 2-3 mánuðir.
Ákært fyrir eina rauðvínsflösku og rútu af bjór
Mál íslenska ríkisins gegn Santé vegna netsölu þeirra á áfengi var þingfest í Héraðsdómi Reykjavíkur í gær en frestað til 2. desember.
Arnar og meðeigandi hans, Elías Blöndal Guðjónsson, eru ákærðir fyrir að bera ábyrgð á sölu áfengis án þess að félög þeirra hefðu leyfi til smásölu áfengis hér á landi. Ákæran lýtur að sölu á einni rauðvínsflösku og einni rútu af bjór, sem samanlagt kostuðu 9.010 krónur. Þá eru þeir einnig ákærðir fyrir peningaþvætti fyrir sömu upphæð.
Í kvörtuninni til NEL er bent á að embættið hafi lýst því yfir að engar frekari ákærur verði gefnar út fyrr en niðurstaða í hliðstæðu prófmáli fyrir Landsrétti lægi fyrir. Það mál snýr að sölu Smáríkisins á einni hvítvínsbelju og er enn óútkljáð. Ákæran á hendur Santé gangi því þvert á yfirlýst verklag.
Segir ríkið hafa málað sig út í horn
Margar netáfengisverslanir hafa skotið upp kollinum á undanförnum árum. Áfengissala í búðum hefur eingöngu verið í höndum ÁTVR. Það er aftur á móti mat netverslananna að netverslun með áfengi sé lögleg samkvæmt EES-samningnum. Hann tryggi að hægt sé að kaupa vörur frá öðrum löndum EES og flytja hingað til lands.
Santé segir tollalög ekki fela í sér undanþágu frá einkarétti hins opinbera til smásölu á áfengi.
Áfengis- og tóbaksverslun ríkisins, og áður Fríhöfnin ehf. í eigu Isavia, hafi haft einkarétt á hefðbundinni smásölu á áfengi. Það hafi verið viðurkennt með skýrum ákvæðum í áfengislögum og lögum um ÁTVR. Stjórnvöld hafi staðfest að rekstur Fríhafnarinnar væri ríkiseinkasala.
Í samtali við fréttastofu segir Arnar sér þykja það skondið að standa í dómsmáli þar sem ákæruvaldið starfi fyrir samkeppnisaðilann: íslenska ríkið. Ríkið sé að hans mati búið að mála sig út í horn.
Ljóst sé að málið sé heit kartafla og enginn stjórnmálaflokkur hafi lagt það á sig að taka málið fyrir. Á sama tíma hafi lögum verið breytt og sala áfengis verið heimiluð á framleiðslustað.
